Moldovada  o yaşayannarın  sayısı zeedelenner, angıları  telefon hırsızlardan zeet çektilär. Onnara telefon açtılar da söledilär ani onnarın hısımnarı avariyaya düştü da lääzım para ki onu kurtarmaa kapandan. Gagauziyada bölä hısımnar 4 kişiyi aldattılar.

Bitki vakıtlar sıklaştılar olaylar, açan insannardan yalannan para çalerlar. Hırsızlar  taa çok  telefon açerlar büük yaştan insannara, angıları  staţionar telefonnarı kullanerlar.  Yalancılar rus dilindä lafederlär.  Onuştan bu gibi şmekiriyalara taa çok Gagauziyanın, Tarakliya hem Belţ dolaylarından  insannar tutulerlar.  Bu iş için haberledi Çadır kasabasının poliţiya inspektoratın kriminal aaraştırma bölümün başı Vitaliy Terzi.

«Telefonda lafedärkänä hırsızlar  sölerlär, ani insanın senselesi avariyaya düşttü, neredä başka kişilär da zararlandı, da kötü halda bulunerlar,  da onnara  mediţina yardımı pek lääzım.  Poliţiyaya haber verilmesin deyni hırsızlar sölerlär, ani lääzım çok para, ki ödemää avariyaya düşän kişilerä ilaçlanması için. Bu yalan, ama insan inaner da kendi paralarını verer»,- haberledi Çadır kasabasının poliţiya inspektoratın kriminal aaraştırma bölümün başı Vitaliy Terzi.

Poliţiyada söledilär, ani hepsi olaylarda sţenariy bir da hırsızların kurbannarınnan yaşlı insannar olerlar.Telefonda lafedärkänä hırsızlar türlü psihologiya metodları kullanerlar, söler Vitaliy Terzi. 

«Hırsızların aralarında var psihologlar, aktörlar. Onnar aalamaa çekederlär da insan inanmaa çekeder.  Onnar sölerlär ani parayi hızlı toplamaa lääzım hem vermää onnarı.  Vermerlär kolaylık hısımnarnan hem poliţiyaylan baalanmaa, söleyip, ani hepsini lääzım yapmaa ölä nicä onnar deerlär, zerä başka türlü yaparsaydılar  avariyada kabaatlı hısımı kapana düşecek.   Taa sık sölerlär  insana, ani poliţiyaylan onnar lafederläa, ama bu yalan»,- Vitaliy Terzi nışannadı.

Poliţiya yalvarer insan taa açıkgöz olsun hem da düşmesin hırsızların ellerinä.

 «Eer sizinnän bölä birbişey olduysaydı, da sizä telefon açtıysaydılar, ani avariya yada başka birbişey oldu neredä   bilinmeyän insannar isteerlär siz para veräsiniz, hemen kapadınız telefonu da baalanın kendi hısımnarınızlan, angılarış için laf gider. Bundan kaarä poliţiyaya haber veriniz, baalanıp 112 nomeradan birleşik izmetinnän»,- ekledi uzman.

 Gagauziyada telefon hırsızların kurbannarınnan dört kişi oldu – iki Komratta, iki da kişi Çadırda. Hırsızları poliţiya şansora tuttu. 

Avtor: N.Andrieş, operator: Gr.Stavilov, montaj: M.Kazaku