NEWSPAPER

Gagauziyanın şannı artisti Lüdmila Tukan dokuzuncu muzıka diskini hazırlȇȇr. Eni türküleri yazȇr hem klipları çıkarȇr. Lüdmila bitki yıllar şanson stilinä ön verer. Gagauz artistkası eniliklärlän yaradıcılıında tanıştırȇr.

Gagauziya Radio Televizionu cümnä yayın kompaniyasının Gözledici Sovedin toplantı planı doluydu. Angı soruşlar bakıldı hem angı kararlar alındı materialda. 

GRT cümnä kompaniyasının çalışannarın sayısı soruşu genıştän bakıldı Gözledici Sovetın oturuşunda. Kabledildi karar  yapmaa kimi diişilmekleri.

“Biz kablettik diişilmekleri çalışannarın sayısına neçin ani bücet şansora kabledildi. Buna görä  biz aldık ölä kararı, ani hem kompaniyada para olsun, hem biz uzadılmış ellän gezmeyelim”, — açıkladı Gözledici Sovetın başı Mihail Vlah.

«Gözledici Sovetın oturuşunda bakıldı en önemli soruş – kompaniyada çalışannarın sayısı. Nicä bän geçmiş yılın sonunda sölediydim intervyüda, ani biz azaldacez taa ileri kabledilmiş çalışannarın listesini 6 proţendä, tä bu oturuşta ona görä Gözledici Soveti aldı kararı yoketmää 4 vakansiyayı Valkaneş hem Çadır – Lunga korpunktlarında. Şindilik biz onnarı çalıştıramȇȇrız, ama umutlanȇrız ani bu soruşa taa dönecez da yılın ortasına dooru bu kasabalarda açabilecez ilerdän plana koyulmuş korpunktları», — annaştırdı GRT kompaniyasının başı Vadim Anastasov.

Geçän yılın bitkisinda Moldova televizion hem radio sovedi cezalandırdı GRT kompaniyasını 10 bin leyä o üzerä, ani devlet dilindä programalar lääzımnı sayıda efirä çıkmȇȇrlar. Kompaniyanın öndercisi  açıkladı  çıkışı bu durumdan.

“Hep ölä Gözledici Sovedi baktı soruşu baalı 10 bin leylik cezaylan, angısını Moldova  TV hem Radio  sovetdi koydu GRT kompaniyasına o üzerä, ani yatyında eterincä yoktu programalar devlet dilindä. Savaşacez çözmää bu problemayı da bulmaa devlet dilini bilän hem gözäl lafedän uzmanı, ki o yapsın programaları bu dildä. Onnar lääzım gözäl ötsünnär bizim yayınımızda”, — söledi Vadim Anastasov.

“Biz da ötää dooru bakacez ani bu işleri onnar (GRT) yapsınnar taa üüsek uurda, ana dili da olsun, moldovan dili da olsun. Bän düşünerim ani bu üç ayın içindä biz savaşacez kompaniyanın işini taa üüsek uura kaldırmaa, neçin ani az vardı moldovan dili yayında, bitki vakıtlar biraz zeedelendi ama etmedi, da bizi bu iş için cezalandırdılar. Onuştan ilerki üç ay bu uura işleyecez”, — haberledi  GRT Gözledici Sovedin öndercisi Mihail Vlah.

GRT kanalın 24 saatlık yayınındavar programalar üç dildä: gagauz, rus hem devlet dilindä. Onnarın arasında var Moldova 1 milli kanalın programaları da.

Avtor: T. Stavilova, video: G. Stavilov, V. Kıssa, montaj: M. Kazaku

Bakannık Komiteti yanvarin 12-dä kendi oturuşunda kabletti programayı Gagauziyanın erli yol infrastrukturasına 2023-cü yıla. Kimi yolların paylarında remont işleri derindän yapılacek.

Bu yıl dolay yollarına devlet büdjetindän 21 mln leydän zeedä verilecek. Paralar derindän remont işlerinä doorudulaceklar hem kış zamanında yolların kullanmasına.

«13 yolda kuyular kapadılacek, 5 yol da biyaz taşlan enidän döşenilecek. Bu işerä 2mln leydän biraz zeedä Programada bakılı», — söledi Gagauziyanın düzücülük hem infrastruktura Bakanı Оleg Orlioglo.

Finanslar kararlı yolların korkunçsuz durumnarına getirmää. Biyaz sınırları çizmää, yol nışannarını koymaa hem diiştirmää. 2023-cü yılda avtonomiyada bu uura 481 176 ley kararlı.

«Kışın yolların bakımına brakıldı 306 006 ley. Suuk vakıtta avtonomiyada 145 368 metra yol bakılȇr», — ekledi  Оleg Orlioglo.

Bakannık komitetindä belli ettilär o yolların paylarını, angılarında başarıldı işlär yada  yapılaceklar.

«Temeldän tertiplenecek L 627 yolu Caltay küüyündä. İş orada gider 2021 yıldan beri. Bu yıl onu neetlenerlär bitirmää. Bu uura Programada ayırıldı 15 mln ley», — açıkladı  Оleg Orlioglo.

Yolların bir payı yapılacek, angısı Kırlannara götürer. İşlerä lääzım olacek 1,911 bin ley. Taa 80 bin ley smetaya kararlı.

Erideki yollara kararlı paralara derindän remont işleri yapılacek, yolların var olan durumu tutturulacek, tehnika koşulları yapılaceklar laboratoriya aaraştırmakları hem proekt dokumentleri.