Avtonomiyanın 8 üüretim kurumu 20 notebook kablettilär proektin çerçevesindä, angısını giriştirer Moldovada YMCA kurumu (Young Men’s Christian Association) barabar halklararası kompyüter yapan kompaniyasınnan.
Moldovada YMCA kurumu (Genç insannar hristian asoţiaţiyası) barabar halklararası kompyüterlerı yapan kurumunnan eni proektä görä çalışmaa başladılar. Ona görä 5 bindän zeedä eni zamandaş kompyüterları Moldovanın üüretim kurumnarına vereceklär.
«Mutluyuz, ani yakıştı eni tehnikayı Gagauziyanın 8 üüretim kurumuna pay etmää. 160 notebook-tan zeedä üüredicilär kabledeceklär. Onnarın bütün paası 5 million leydän zeedä kurȇr», — açıkladı Dmitriy Roybu, Moldovada YMCA kurumun prezidenti.
Gagauziyanın 8 üüretim kurumu 20 notebook kablettilär informatika kabinetlerinä.
» Bu kompyüterlar bizim uşaklar için. Onnar eni, zamandaş. Saa ol deeriz hepsinä kim yardım eder» , — söledi Komrattakı S. Demirel adına gimnaziya-uşak başçasının başı Olga Tabakar.
Valkaneşteki A. Doljnenko adına liţeyin informatika kabinetindä sade 13 kompyüter var. Üüretim kurumunda klaslar büük 25-30 uşaadan. Herbirinä etmeer tehnika.
«Kararladı, ani bu notebook-lar da hep informatika kabinetindä erleştirleneceklär. Bölä herbir uşaan kendi kompyüteri olacȇk. Üüretim proţesi dä taa kaliteli olacȇk. Uşaklar da ekzamannerä taa islää hazırlanacȇklar», — nışannadı liţeyin başı Larisa Bozbey.
Komrattakı D. Mavrodi adına liţeyin informatika üüredicisi Dmitriy Guç söledi, ani üüretim kurumunda planda var bilgilendirmäk merkezini açmaa, neredä uşaklar serbest vakıdını var nicä olacek geçirsinnär yada derslerä hazırlansınnar. Bu proekt sade fayda liţeyä getirecek, nışannȇȇr Dmitriy Guç.
» Biz isteriz uşakların informaţıya tehnologiya bilgilerini kaaviletmää. Uşaklar bu zanaata çekilerlär. Ama derindän bilmeerlär ne lääzım yapmaa, üürenmää. Bizim daavamız onnarı dorutmaa, üüretmää hem terbitmää», — söledi üüredici.
YMCA kurumu Moldova — gençlerin baamsız, politikaylan diil baalı kurumu, angısı 2010-cu yılda kuruldu.
Avtor: M.Topal, video: G.Stavilov, montaj: A.Gerçu
